នៅសុខៗ ជ្រៀបឈាមតាមជើងធ្មេញ ឬស្នាមអុចក្រហមលើស្បែក ។ តើមកពីមូលហេតុអ្វី ? តាមការស្រាវជ្រាវវេជ្ជសាស្ត្រ អាការៈបែបនេះច្រើនបង្កឡើងដោយជំងឺគ្រាប់ឈាម។ ជំងឺទាំងនោះអាចបណ្តាលមកពី វិបត្តិកំណកឈាម ឬគ្រាប់ឈាមប្លាកែតថយចុះខ្លាំងខុសប្រក្រតី (thrombopénies) ។

១) រោគសញ្ញាខ្លះៗ ដែលលោកអ្នកគួរចាប់អារម្មណ៍៖
– ស្នាមអុចតូចៗពណ៌ក្រហមដូចមូសខាំ នៅលើស្បែក ពិសេសលើអវយវៈ។
– ស្នាមជាំពេលប៉ះពាល់តិចតួច ឬក្រោយពេលចាក់ថ្នាំ។
– ស្នាមជាំដោយឯកឯងដោយមិនបានដឹងខ្លួន។
– អាចចេញឈាមតាមជើងធ្មេញ ដោយឯកឯង ឬពេលដុសធ្មេញ។
– ចំពោះស្ត្រី មានរដូវមកច្រើន និងក្នុងរយៈពេលវែងខុសធម្មតា។
– អាចមានលាមកពណ៌ខ្មៅផុកៗ ឬទឹកនោមមានឈាម (សញ្ញាធ្ងន់ធ្ងរ)។

២) មូលហេតុខ្លះៗ ដែលបណ្តាលអោយមានបញ្ហាបែបនេះ៖
ក. ការផលិតគ្រាប់ឈាមប្លាកែតថយចុះ
– កង្វះជីវជាតិ B12
– ការពិសារស្រាលើសចំណុះ និងរយៈពេលយូរ
– ជំងឺឆ្លងខ្លះ ដែលបណ្តាលមកពីវីរុស (ឧទាហរណ៍ៈ ជំងឺផ្តាសាយ ជំងឺគ្រុនឈាម ជាដើម។)
– ជំងឺមហារីកឈាម
ខ. ការបំផ្លាញប្លាកែតក្នុងសរសៃឈាម
– អ្នកជំងឺមានអង្គបដិបក្សប្រឆាំងនឹងប្លាកែត (PTI, purpura thrombopénique idiopathique)
– ការប្រើប្រាស់ថ្នាំផ្សះច្រើន
– ស្ត្រីមានផ្ទៃពោះខ្លះ
– ជំងឺប្រព័ន្ធភាពស៊ាំធ្វើការខុសប្រក្រតី លក្ខណៈជាប្រព័ន្ធ (maladies systémiques)

៣) មានបញ្ហាបែបនេះ យើងត្រូវដោះស្រាយយ៉ាងដូចម្តេច?
ក) លោកអ្នកគួរមកជួបវេជ្ជបណ្ឌិតជំនាញជំងឺឈាម ដើម្បីស្វែងរករោគវិនិច្ឆ័យពិតប្រាកដ ដើម្បីធ្វើការព្យាបាលអោយបានជាសះស្បើយតាមក្បួនវេជ្ជសាស្ត្រ។ គេធ្វើរោគវិនិច្ឆ័យដោយបូមឈាម និងខួរឆ្អឹង យកទៅវិភាគនៅមន្ទីរពិសោធន៍ ដើម្បីកំណត់ប្រភេទ និងមូលហេតុនៃជំងឺនេះ ។
ខ) ការព្យាបាល
ការព្យាបាលតាមមគ្គុទេសព្យាបាលសកល (universal guidelines) អាចព្យាបាលដោយថ្នាំប្រឆាំងនឹងការបំផ្លាញប្លាកែត និងព្យាបាលមូលហេតុផ្សេងៗទៀត ដែលធ្វើអោយការផលិតប្លាកែតថយចុះ ។

៤) អនុសាសន៍របស់វេជ្ជបណ្ឌិត៖
” ប្រសិនបើលោកអ្នកមានរោគសញ្ញាដូចខាងលើ សូមមកទទួលការពិគ្រោះជំងឺជាមួយ វេជ្ជបណ្ឌិតជំនាញ ផ្នែកជំងឺឈាមនៃមន្ទីរពេទ្យកាល់ម៉ែត ដើម្បីព្យាបាលអោយទាន់ពេលវេលា និងឈានទៅជាសះស្បើយបាន ៕

សូមដោនឡូត GrandMed App ឥឡូវនេះ ដើម្បីណាត់ជួបវេជ្ជបណ្ឌិតជំនាញ !
1. ដោនឡូតអេប សំរាប់ទូរស័ព្ទ Iphone
https://apps.apple.com/nz/app/grandmed/id1592706175
2. ដោនឡូតអេប សំរាប់ទូរស័ព្ទ Samsung
https://play.google.com/store/apps/details?id=com.grandMed